الأكل بحر مالوش آخر. طول الوقت بتظهر أكلات ممكن تبقى جديدة علينا. أو نعرف وصفات مختلفة ماجربنهاش قبل كده. وعلشان عالم الأكل مليان مفاجآت، فيه أطعمة معينة ممكن تتاكل نية عادي. في الحالة دي فايدتها الغذائية بتكون أعلى للجسم، وكمان بتحارب بعض الأمراض الخطيرة. تعالوا نتعرف عليها، حسب ما نشر "الوطن":

1- الكوسة

بيتم أكلها نية بوضعها على السلطات أو الأطباق الباردة. من خلال تقطيعها مع الخضروات التانية.

2- العدس

ممكن أكله بعد ما ينبت وده بياخد حوالي 3 أيام. بنغسل الحبوب وننقعها طوال الليل في المياه. تاني يوم بنغسلها ونحطها في وعاء زجاجي كبير مع قماش مسامي، علشان يسمح بمرور الهواء. ولمدة يومين نشطف الحبوب كل 6 ساعات. وبعد كده بيتاكل بعد خروج البراعم منه.

3- قرع العسل

قرع العسل بيدخل في وصفات وأكلات وهو ني. ممكن إضافته على السلطات أو خلطه مع العصائر الطبيعية.

4- البيض

البعض بيفضل تناول البيض بدون طهي، لأنه بيحتوي على 6 جرام من البروتين. ونسبة عالية من الفيتامينات زي A و B2 و B5 و B11، وده بيساهم في تحسين وظائف الدماغ والجهاز العصبي والمناعة. مع العلم أن العناصر دي مش بتتغير بعد طهيه على النار.

5- الرز البري

بيختلف عن الرز العادي، اللي يتم تناوله بعد غليه وتطهيه في المياه. إنما البري ممكن أكله بعد نقعه لمدة يومين في المياه، بدون طهي. بيكون عبارة عن عشب.

6- الأعشاب البحرية

بتتميز الأعشاب البحرية بأنها منخفضة السعرات لعدد كبير من العناصر الغذائية، وبتحتوي كمان على الحديد والكالسيوم والمغنيسيوم واليود. طهيها بيقلل قيمتها الغذائية، علشان كده من الأفضل تناولها نية مع السلطات.

7- البطاطس

فيه اللي بيحب ياكل البطاطس نية، رغم طعمها. بس يُفضل الابتعاد عن الثمرة اللي لونها أخضر، لإنها بتكون سموم ضارة. صحيح النشا الموجود في البطاطس النية، ممكن يسبب مشاكل معوية بسبب صعوبة الهضم. لكن لها تأثير إيجابي مع الأشخاص اللي بيعانوا من مشاكل في القولون.

8- البصل

أكل البصل ني مفيد جدًا للصحة، لإن فيه خصائص بتحمي من أنواع مختلفة من السرطان. وطهيه بيقلل فوائده الكيميائية النباتية.

9- الجزر الأبيض

الجزر الأبيض بيحتوي على فيتامين سي ومضادات الأكسدة، وممكن أكله من خلال وضعه على السلطات. ده غير إن مذاقه أحلى من الجزر العادي.