تجار المخدرات بيلجأوا طول الوقت لحيل مختلفة، علشان يهربوا بضاعتهم لأي مكان بيتجاروا فيه. وكل ما زادت إجراءات التفتيش، كل ما الحيل بتكون مذهلة وبرة الصندوق. زي شحنة الكوكايين اللي كشفها ظباط الجمارك في مطار مالبينسا إيطاليا، وكانت متهربة جوة حبوب القهوة.

القصة بدأت لما وصل المطار طرد لشخص اسمه "سانتينو دي أنطونيو"، وده اسم زعيم مافيا كبير في سلسلة أفلام "John Wick" المعروفة. الأمر اللي لفت انتباه الظباط، وقرروا يفتشوه. جوة الطرد لقوا شنطة فيها 2 كيلو من أفضل حبوب البن الكولومبي، لكن الحبوب كان فيها نقط سودة غريبة. ولما فتحوا الشنطة اكتشفوا إن النقط دي عبارة أجزاء صغيرة من شريط لاصق. والحبوب تم تفريغها بعناية واتحط جواها كوكايين. 130 حباية من أصل 500، تم حشوها بالكوكايين.

الشرطة قررت القبض على "سانتينو"، اللي طلع مجرم في الحقيقة زي الفيلم. الطرد كان مبعوت لمحل بن، لكن صاحب المحل ماكنش عنده فكرة عنه. وبعد كام يوم من المراقبة، ظهر "سانتينو" علشان يستلم الطرد بتاعه. وساعتها تم القبض عليه.