لو بتفكر في طريقة سهلة، تجيب من خلالها آلاف المشاهدات على يوتيوب. مفيش أسهل من القعدة قدام الكاميرا، من غير ما تعمل أي حاجة. وده بالفعل اللي عمله اليوتيوبر الإندونيسي "محمد ديديت".

من شهر تقريبًا نشر "محمد" فيديو مدته أكتر من ساعتين، وهو قاعد في أوضته مابيعملش حاجة غير إنه باصص للكاميرا. الفيديو انتشر بشكل كبير، ومشاهداته دلوقتي قربت من الـ 3 مليون. بعده ظهرت فيديوهات كتير لناس بتحاول تقلده، علشان تنتشر زيه. وبقى فيه فيديوهات لناس مش بتعمل حاجة لمدة بتوصل لـ 8 ساعات.

الفكرة جت لما متابعينه طلبوا منه يعمل فيديو إيجابي تعليمي، ويكون محتواه مفيد للشباب. وبعد تفكير طويل، وصل للنتيجة دي. وقال الأمر متروك للمتابعين علشان يفسروا فايدة المحتوى بطريقتهم.

الغريب في الأمر إن "محمد" كان مقرر إن مدة الفيديو تكون من 5 لـ 10 دقايق، لكنه اندمج في الموضوع أوي وكمل الساعتين. كل اللي كان شاغل باله إن أهله يتصلوا بيه خلال الفترة دي، صحيح كان مقرر مش هيرد على حد، لكن ده ماحصلش.

عاش يا محمد