حسب منظمة الصحة العالمية، أكتر من 264 مليون شخص بيعانوا من الاكتئاب على مستوى العالم. الأرقام دي مؤشر إننا مش بس محتاجين نهتم بصحتنا النفسية، إنما لازم نهتم بنفسية اللي حوالينا كمان. ورغم إننا بنحاول نخفف عن الناس بالكلام، لكن أحيانًا بتطلع مننا عبارت بدون قصد، بيكون تأثيرها السلبي كبير.

دي أشهر العبارات اللي لازم نوقف استخدامها مع شخص مصاب بالاكتئاب:

1- "لازم تخرج أكتر من كده"

صحيح الخروج والتعرض للشمس بشكل دائم، بيحسن الصحة والحالة المزاجية. لأنه بيعزز هرمون السيروتونين المسؤول عن السعادة. لكن لازم ناخد بالنا إن الاكتئاب ده مرض خطير، ومريض الاكتئاب مش هيتخلص منه بمجرد الخروج. لأن ده بالنسبة له مجرد تغيير مكانه على السرير، تحدي كبير.

2- "يا عم فك كده"

الكلمة دي، رغم حسن النية، ممكن تزود حزن المكتئب أكتر. طلبك ده بيبين إنكارك لمرضه وحالته النفسية، لأنه لو يقدر يفك بسهولة كان عمل كده لوحده.

3- "الموضوع كله في دماغك"

الاكتئاب مرض خطير، ومش مجرد فكرة في الدماغ. وأعراضه بتتفاوت بين فقدان الشهية والأرق، لحد الإحساس بالتعب وعدم الأهمية. فأكيد المشكلة دي مش مجرد مود وخلاص.

4- "متأفورش"

لما يشتكى شخص مكتئب من ألم في ضهره، صداع متكرر، أو تدهور الرؤية. فهو مش بيمثل ولا بيأفور. دي كلها أعراض جسدية للاكتئاب، بتخلي ممارسة الحياة اليومية أمر صعب.

5- "أومال غيرك يعمل إيه"

درجات التحمل بشكل عام، بتختلف من شخص للتاني. وضروري تبعد عن مقارنة الشخثص المكتئب بغيره، مهما كلف الأمر. مش علشان حد تاني بيمر بظروف أصعب، نمنع المكتئب من التعبير عن ألمه وحزنه.

6- "بس شكلك بيقول غير كده"

مش ضروري إطلاقًا إن المكتئب يفضل مكشر طول الوقت. اكتئاب الضحك ده حالة خطيرة. المصابين به، رغم إحساسهم الشديد بالحزن، لكن عمرهم ما يبينوا ده قدام حد. حتى أصحابهم وزمايلهم في الشغل ممكن مايلاحظوش حاجة. فبدل ما تفرض رأيك وتحكم عليهم، الأفضل إنك تفهمهم، تديهم مساحتهم، وتعاملهم بلطف. لأن عمرك ما تعرف الشخص ده بيمر بإيه.