غسل الأسنان عادة يومية مهمة، نقدر نقول إنها اتحولت لروتين بنعمله بشكل تلقائي. بس هل إحنا بنغسل أسنانا صح؟ هل في حاجات معينة ممكن نعملها تضر أسنانا؟ وكمان في النهاية تسبب التسوس؟

الفلورايد هو أصل المعجون

معجون الأسنان، الاختراع المذهل اللي بنستخدمه كل يوم، بيحتوي على مزيج من المكونات أهمها الفلورايد. وده وظيفته حماية طبقة المينا على الأسنان من البكتيريا اللي بتسبب الأمراض المعدية زي التسوس. بمعنى تاني، استخدام معجون الأسنان لتنظيف أسنانك، بيقلل خطر التسوس بحوالي 25٪ لـ 45٪ .

لكن لازم ناخد بالنا من مدة تنظيف الأسنان. أغلب الناس بتستغرق من 45 لـ 70 ثانية بس في تنظيف أسنانهم، وده يمكن بسبب رتم الحياة السريع. إنما خبراء الأسنان بيوصوا بتنظيف الأسنان لمدة دقيقتين على الأقل، لمنع التسوس والأمراض التانية المتعلقة بنظافة الفم.

الشطف المفرط (المضمضة) ممكن يضر أسنانك

أغلبنا بيتمضمض كويس بعد غسل الأسنان، علشان يتخلص من المعجون بشكل كامل. لكن الخبراء بينصحوا إن من الأفضل بصق بقايا المعجون من الفهم، وعدم المضمضة بالمياه. لأن الشطف المفرط بالمياه ممكن يزيل الفلورايد عن الأسنان، وبالتالي الحماية ضد التسوس بتقل.

غسل الأسنان قبل النوم مهم جدًا وضروري

غسل الأسنان بالليل مهم جدًا لأقصى درجة. لإن وإحنا نايمين مش بنفرز نفس كمية اللعاب، اللي بنفرزها وإحنا صاحيين. وبالتالي الفم مش بيقدر يزيل كل بقايا الأكل اللي بتغذى البكتيريا، وهنا بيحصل التسوس بسهولة. علشان كده أطباء الأسنان بينصحوا بتجنب تناول الطعام بعد غسل الأسنان.

سكر أقل يعني تسوس أقل

اقترحت منظمة الصحة العالمية تقليل تناول السكريات لـ 10٪ من السعرات الحرارية اليومية. ده بيساعد في حماية الأسنان بشكل أكبر. كمان من الأفضل تناول الفاكهة عن شربها كعصير أو في صورة مشروبات مصنعة، لأن البكتيريا اللي بتسبب تسوس الأسنان بتتغذى على السكريات دي.