علشان ينقذ تجارته بعد ما ضربها وباء كورونا، قرر "جوني بيري" - جواهرجي في ولاية ميتشجان - إنه يقفل المحل، ويدفن مجوهرات بقيمة مليون دولار في مناطق مختلفة. ويحولها لكنز لأي حد مستعد يدفع مقابل إرشادات بتدل على موقعه. 

لما انتشر وباء كورونا، ولقى "جوني" إنه بدأ يخسر كتير. ماكنش قدامه هو وزوجته غير حل من اتنين: إما يبيعوا كل حاجة ويتقاعدوا تمامًا، أو إنهم يشوفوا طريقة تانية يكسبوا بيها فلوس. ولجأوا للاختيار التاني.

وبمساعدة زوجته أطلق "جوني" مسابقة (البحث عن الكنز)، اللي بتتكون من تحديات مختلفة. المشاركين فيها بيشتروا تذكرة لتحدي منهم، علشان ياخدوا مجموعة إرشادات تساعدهم في تحديد مكان الكنز. خلال رحلة البحث لازم يحلوا بعض الألغاز، واللي يلاقي الكنز يقدر طبعًا يحتفظ به لنفسه. التحدي الأول هيبدأ يوم 15 أغسطس، وتم بيع كل التذاكر بتاعته. أما التحدي التاني هينطلق يوم 13 سبتمبر.

وتم تحذير المشاركين على الموقع الرسمي للمسابقة، من مشاركة أي معلومات يحصلوا عليها من خلال مواقع التواصل الاجتماعي، أو مع المعارف. والمخالفين هيتم استبعادهم. وأي محاولة للحصور على الكنز بعد الاستبعاد، هتقابل إجراءات قضائية مشددة. وأكد "جوني" إن كل الكنوز المخفية متراقبة من خلال الـ GPS، علشان يقدر يعرف إذا تم تحريكها في أي وقت.