اتعودنا من الشعب الصيني يقدم لنا كل ما هو جديد ومُفتكس، في مختلف المجالات. فمش غريب لما الافتكاسات دي تكون في مجال الرياضة كمان. وتحديدًا سباقات الجري.

"سباق الحذاء اللوحي" هي رياضة تقليدية بيتميز بيها أقليم جوناكسي الصيني. نشاط فريد من نوعه، بيتطلب درجة كبيرة من الالتزام. لأن فيها 3 أشخاص بيجروا وهم لابسين نفس الحذاء.

الرياضة دي بيرجع أصلها لقبائل "المينج" القديمة. لما كانوا بيستخدموها في تدريب الجنود خلال الحرب. علشان ينظموا طريقة مشيهم بشكل متناسق. ويحسنوا من قدراتهم القتالية.

في الرياضة الغريبة دي، الفريق بيتكون من 3 أفراد بيجروا مع بعض في نفس الحذاء. اللي هو عبارة عن لوح خشب وأربطة من الجلد علشان تثبت الأقدام. اللوح ده طوله متر، عرضه 9 سم، وسمكه 3 سم. أعضاء الفريق لازم يكون بينهم درجة عالية من التناسق. لأن أي فرد من الـ 3 لو زود في الأداء أو اتراجع، ممكن يتسبب في إن الفريق كله يقع على الأرض.

في 2005، الهيئة الوطنية للشؤون المدنية اعتمدت مشروع سباق الحذاء اللوحي، واحد من الفعاليات الرسمية في الألعاب السنوية للرياضات التقليدية للأقليات القومية. بيمارسها الرجال والسيدات، تحديدًا من شعب الشوانج.