اتعودنا كل فترة والتانية نسمع عن حالات طلاق لأسباب غريبة. واستمرارًا لسلسة العجائب دي، رفعت سيدة هندية دعوى قضائية على زوجها بتطلب الطلاق. بعد مرور 18 شهر بس على زواجهم، والسبب إنه بيحبها أكتر من اللازم.

لما اتسألت الزوجة في المحكمة عن سبب طلبها للطلاق، قالت إن زوجها بيحبها بشكل مفرط. لدرجة إنهم مبيتخانقوش خالص. وعمره ما زعق لها ولا جادلها في أي موضوع اختلفوا عليه. والأسوأ من كده إنه بيطبخلها وبيساعدها في شغل البيت. الأمر اللي خلاها مش سعيدة في حياتها معاه، وبقت مش قادرة تكمل بالشكل ده.

بعد سماع الأقوال، القاضي رفض طلب الزوجة لأنه "تافه". وطلب من الزوجين يحلوا المشكلة ما بينهم. لكن الزوجة ماعجبهاش رأي المحكمة، فلجأت لمجلس القرية. اللي بدوره رفض طلبها بعد ما سمع أسبابها الغريبة.

الزوج صرح في واحدة من الصحف الهندية، إنه مش شايف إنه بيعمل حاجة غلط. هو بيحب زوجته وعايز يكون بالنسبة لها أفضل زوج.