مفيش حد ماتمناش ولو لمرة إنه يكون غني. بس أكيد الموضوع بيحتاج لتخطيط، خاصة لو هبتدأ من الصفر. وحتى لما تخطط كويس وتبدأ توفر فلوسك، وارد جدًا تلاقي وضعك مابيتقدمش كتير. ده سببه عادات انت بتعملها بدون تركيز، بتضيع فلوسك باستمرار من غير ماتحس. فتعالوا نقول لكم على 8 أخطاء، دايمًا بيقع فيها اللي بيفكروا في توفير فلوسهم:

1- بيشتروا حاجات تكلفتها عالية

بيقولوا "اللي ماتقدرش تشتريه مرتين، ماتقدرش تتحمل مصاريفه". مفيش داعي نجري ورا أي منتج لمجرد إنه مشهور أو منتشر وخلاص. لازم نبقى عارفين مقدرتنا المادية في كل حاجة. الموبايل الغالي اللي تمنه قد مرتبك مرتين تلاتة، لو اتكسر مثلًا مش هتقدر تشتريه تاني بكرة. وهكذا في كل حاجة.

2- بيصرفوا بسهولة وبدون تفكير

طبيعي إن الواحد يشيل أي مبلغ على جنب، تحسبًا لأي ظرف لو تعب مثلًا أو احتاج لسفر أو غيره. لكن ماينفعش علشان الواحد محوش قرشين، يصرفهم على أي حاجة تيجي في باله، لمجرد إن معاه فلوس. ماتوفرش اللي اتبقى بعد ما تصرف، لكن اصرف اللي اتبقى بعد التوفير.

3- عايشين بالـ credit card

الأجازة اللي انت خططت لها ودفعت فلوسها بالكريدت، أكبر دليل إن عندك مشكلة في إدارة فلوسك وتوفيرها. لإنك طبعًا هتدفع فلوسها من رصيدك، ومش هتقدر تخطط لرحلتك اللي جاية أو الحاجة اللي بتفكر تشتريها. ماينفعش بأي شكل نصرف فلوسنا قبل ما تكون معانا. وضروري نوقف تعاملاتنا بالـ credit card.

4- بيخافوا من المخاطرة

مفيش حد بيقدر يزود فلوسه وهو بيعمل نفس الحاجة طول الوقت. ده مش معناه إنك تبطل توفر فلوسك، لكن مفيش مانع تجرب حاجة جديدة. عن طريق التفكير في وسيلة جديدة أو حتى تجربة شغل أو مشروع جديدة. طول ما انت بتجدد من نفسك، أكيد دخلك وإمكانياتك هيزيدوا. لكن مش وانت محلك سر زي ما انت.

5- مش بيستثمروا في نفسهم

الدنيا بتتغير وتتطور من حوالينا باستمرار، وعلشان تحافظ على وضعك ومكانك لازم انت كمان تتطور. ضروري الواحد يطور من مهاراته ويستثمر في نفسه بشكل كبير، لأن ده مهم لأي تجربة أو مشروع جديد. شوف انت إيه أكتر حاجة بتشدك، وخصص جزء من فلوسك علشان تتقنها.

6- مابيحاولوش يزودوا دخلهم 

مفيش أي مانع إن مرتبات الموظفين في أي مكان تتفاوت، حسب خبراتهم وإمكانياتهم. فلو انت متمكن من أدواتك في أي شغل، لازم تبين ده وتأكده بالنتايج. ساعتها تقدر تطلب زيادة مرتبك إذا كان ده متاح. طالما عملت كل المطلوب على أكمل وجه. كمان مفيش مانع لو جتلك فرصة تانية في مكان جديد بوضع أفضل، تغتنمها وتخوض التجربة. ده جانب من الاستثمار والمخاطرة اللي قولناهم فوق.

7- مابيتحكموش في فلوسهم

لو مابتقدرش تحدد كمية الفلوس اللي هتتبقى معاك بعد الصرف، فانت بعيد كل البعد عن التوفير. لازم دايمًا تكون عارف مقدار دخلك ومقدار مصروفاتك. ولازم تحط ميزانية لكل حاجة بتخطط لها. ده هيساعدك مش بس في التوفير، إنما هتكون مستعد لأي ظرف طاريء. وتحل أي مشكلة تقابلك بهدوء.

8- بيشاركوا خططهم مع كل الناس

توضيح كل اللي بتعمله علشان تحوش مع أي حد تقابله، مش هيفرق مع كل الناس. وكتير منهم هيحاول يحبطك ويبوظ كل خططك. وفي منهم اللي مش هيكون قاصد ده أكيد، لكن للأسف النتيجة واحدة. وأقل كلمة بتفرق. ده حتى المثل بيقول "داري على شمعتك تقيد".