دايمًا لما بندور على شغل مش بنحب نسمع جملة "هنكون على اتصال" بعد الإنترفيو. لأن المقصود منها غالبًا هو الرفض، لكن بشكل مهذب. وبنفضل نسأل نفسنا يا ترى إيه اللي قولناه غلط في المقابلة. علشان كده هنقول لكم على إجابة أكتر 6 أسئلة صعبة في أي إنترفيو:
1- إيه هي نقط ضعفك؟
لازم تاخد السؤال ده بجدية، وابعد تمامًا عن الهزار. اعترف بنقط ضعفك، ووضح إزاي اتغلبت عليها وحولتها لمميزات. مثلًا لو مستواك في الإنجليزي كان ضعيف، قول إن أخدت كورسات لحد ما بقيت ممتاز فيه. مفيش حد خالي من العيوب، واللي بيعمل الإنترفيو هيقدر صراحتك ومجهودك في تطوير نفسك.
2- لو زمايلك في الشغل هيوصفوك هيقولوا إيه؟
الهدف من السؤال ده إنه يبين إزاي المتقدم للوظيفة ممكن يقيم نفسه بشكل حيادي. هنا بلاش تاخد الموضوع بسخرية، أو تبالغ في تقدير نفسك. إنما ممكن إجابتك تكون: "أعتقد زمايلي ممكن يقدروا فيا كزا وكزا"، وقول أهم مميزاتك وسط الكلام. ولو اتسألت عن مساعدة زمايلك، فدي فرصة تانية تدعم مميزاتك.
3- لو كنت فاكهة كنت هتبقى إيه؟
الهدف من السؤال ده معرفة رد فعلك في نفس اللحظة. هل هتتوتر؟ هتتجاهل السؤال؟ ولا هتقول إنك مش فاهم؟ كل ده بيبين للي بيعمل الإنترفيو، انت هتتصرف إزاي في أي موقف مفاجيء. مفيش إجابة صح، مش هتفرق اخترت برتقال أو تفاح. المهم إنك تجاوب بثبات وهدوء مع ابتسامة صغيرة.
4- اوصف نفسك بكلمة واحدة
تقدر تستخدم صفات أو اسماء علشان توصف نفسك. ويُفضل تختار بعناية مش بشكل عشوائي. يعني لو عايز تبقى رئيس قسم معين، ممكن تستخدم "قائد". كمان في إجابات عامة للسؤال ده زي: واقعي أو منفتح.
5- لو منعنا صرف مرتبك هتكمل شغل معانا؟
الإجابة في المعتاد بتكون "أه". لأن المرشح شايف إن ده بالظبط اللي الموظف محتاج يعرفه عنه، الإخلاص والوفاء للعمل. لكن الأمر مختلف تمامًا، لأن الموظف بيدور على المرشح اللي بيقدر مهاراته العملية. فالإجابة الصح هي "لأ".
6- فيه حاجة عايز تسأل عنها؟
ده السؤال اللي بينهي أي إنترفيو، فلازم تكون مستعد له كويس. بلاش تسأل عن حاجات، إجاباتها كانت موجودة في إعلان الوظيفة. وكمان غياب الأسئلة تمامًا ممكن مش أفضل حاجة من وجهة نظر الموظف. فمثلًا ممكن تسأل عن سبب رحيل الموظف اللي قبلك. ده هيبين إن عندك مهارات تحليلة كويسة، وكمان هتقدر تتجنب أخطاؤه الي وقع فيها.
