مع إيقاع الحياة السريع، بقينا نصحى من النوم مستعجلين دايمًا، بسبب شغلنا أو مشاويرنا اليومية. الأمر اللي بيخلينا نرتكب بعض العادات المضرة لصحتنا. ومع الوقت الضرر بيزيد، وبتزيد معاه آثاره.

يلا نتعرف على أهم العادات دي، حسب ما نشر موقع "الكونسلتو": 

1- ترْك السرير بمجرد الاستيقاظ

لما نصحى من النوم لازم نستنى شوية على السرير قبل ما نقوم. لأن تغيير وضعية الجسم من الاستلقاء للوقوف بشكل مفاجئ، ممكن يسبب انخفاض ضغط الدم. ده غير الشعور بالدوخة والهبوط.

2- ضبط المنبه على نظام الغفوة

أغلبنا متعود على نظام الغفوة في المنبة، علشان يقدر يقوم الصبح. لكن الدراسات حذرت من العادة دي، لأن النوم لمدة 10 دقايق بيأثر بالسلب على نشاط الجسم طول اليوم.

3- القعدة في الضلمة

رغم إن البعض بيحب يسيب الأوضة مقفولة لما يصحى، لكن دي عادة بتحرمهم من فوايد كتير بتقدمها الشمس للصحة العامة. زي تعزيز النشاط، زيادة التركيز، وإمداد الجسم بفيتامين "د".

4- شرب القهوة على الريق

فنجان القهوة على الريق الصبح، حاجه أساسية عند ناس كتير. لازم يبدأوا به يومهم، على أساس إن الكافيين هيفوقهم ويمدهم بالطاقة باقي اليوم. لكن شرب القهوة على الريق له أضرار كتيرة منها: ارتفاع ضغط الدم - زيادة ضربات القلب - قرح المعدة - ارتفاع الكوليسترول في الدم.

5- عدم غسل الأسنان

نشاط بكتيريا الفم بيزيد خلال النوم. فلو ما تمش تنظيف الأسنان بالفرشاة والمعجون، هيزيد تأثير البكتيريا. وهيحصل تسوس الأسنان والتهاب اللثة.

6- إهمال وجبة الفطار

وجبة الفطار هي أهم وجبة في اليوم، وإهمالها بيقلل قدرة الجسم على القيام بالأنشطة اليومية. ده غير الشعور بالصداع والتعب، بسبب عدم حصول الجسم على الجرعة الصباحية من العناصر الغذائية المفيدة، اللي بتمده بالطاقة.

7- تجاهل استخدام كريم الشمس في الصيف

في الصيف درجات الحرارة بتزيد بشكل كبير. واستخدام الكريمات الواقية من الشمس ضروري قبل الخروج من البيت. لأنها بتحمي من أضرار الأشعة فوق البنفسجية، زي الحروق وسرطان الجلد.