معظمنا عارف أهمية وجبة الفطار في حياتنا، هي اللي بتمشي يومنا وبتدينا طاقة من غيرها منعرفش ننجز أشغالنا ومشاويرنا بشكل صح، لكن أوقات كتير بنهمل في جودة وجبة الأفطار، وبناكل بطريقة غير صحية، وبنكتشف الأمر ده بعد ما بنكون وقعنا في الفخ، وعلشان فطارنا يكون صحي ضروري نبعد عن بعض الأطعمة، وهي بحسب ما نشرها موقع الكونسلتو:

1- المشروبات الغازية

شرب المشروبات الغازية بيضر الصحة أيًا كان الوقت اللي هتتشرب فيه، وخطورتها بتزيد وقت شربها على معدة فاضية، لإنها ممكن تسبب مشاكل صحية كبيرة زي: الغثيان، الغازات، وانتفاخ المعدة، وتكرار الأمر ده بيعرضنا للإصابة بالتهاب الأمعاء، عشان كده لازم نستبدلها بأي مشروب صحي.

2- الأطعمة الحارة

وجود أطعمة حارة في وجبة الإفطار بيسبب تهيج بطانة المعدة، خاصة لو كانت أول حاجه تنزل المعدة، وكمان بتزود فرص التعرض للحموضة اللي بتستمر لساعات طويلة على مدار اليوم، وبالتالي الشعور بانزعاج وألم في البطن، فضروري نبعد عنها في وجبة الفطار.

3- المشروبات الباردة

شرب القهوة الباردة أو الشاي المثلج على الفطار بيساهم بنسبة كبيرة في إتلاف الغشاء المخاطي وإبطاء عملية الهضم، وعلشان كده احرص إن أول حاجه تبدأ بيها يومك تكون المياه الفاترة أو شاي بالليمون أو شاي بالزنجبيل، بكده هتحافظ على صحة جهازك الهضمي.

4- الخضروات النية

السلطات بتساعد على إنقاص الوزن والحفاظ على الصحة بشكل عام، لكن تناول انتفاخالخضروات النية على معدة فاضية ممكن يزود العبء على الجهاز الهضمي، الأمر اللي بيؤدي لآلام البطن والانتفاخ، وينصح بتقليلها وقت الفطار.

5- الحمضيات

تناول الفاكهة الحمضية على الفطار وقبل تناول أي طعام تاني، مش أفضل حاجه للجسم، لإنها مصدر غني بالألياف وبالتالي بتسبب عبء إضافي على المعدة، ده غير إن الأحماض الموجودة فيها بتزود إنتاج حموضة المعدة، ويفضل تناولها بعد الأكل.

المصدر: الكونسلتو