في الفترة الأخيرة، اتعودنا نشوف صور للفنانة ياسمين صبري بتظهر الفخامة والمستوى المادي العالي اللي بتعيشه حاليًا، ومؤخرًا، نشرت ياسمين على حسابها الرسمي على إنستجرام صورة من داخل طيارتها الخاصة، ظهرت فيها بمظهر كلاسيكي أنيق وعلى الكرسي جنبها شنطة لفتت الأنظار لها بسبب سعرها الغالي جدًا.

الصورة حققت جدل واسع، خاصة بعد الكشف عن سعر الشنطة ماركة "Hermes Berkin"، اللي وصل لـ 20 ألف دولار أمريكي، يعني حوالي 315 ألف جنية مصري، ناس كتير اتهموا ياسمين بإنها بتستعرض مشاهد من حياتها الفخمة، وإن الأمر ده بيستفز عدد كبير من الفقراء اللي عايشين في نفس البلد اللي هي عايشة فيها.

صورة ياسمين الأخيرة، تزامنت مع صورة سيدة فقيرة تانية ظهرت تحت الأمطار وهي بتبيع أكياس ترمس، وفي عينها حزن وصبر على حالها، وبدأت وسائل إعلام تنشر صورة ياسمين بجانب صورة السيدة اللي أصبح اسمها "سيدة المطر"، في مقارنة الهدف منها إظهار الفرق في المستويات بين المصريين.

ياسمين اتعاملت مع الهجوم عليها بذكاء شديد، وقررت تستغل المقارنة دي لعمل لفتة إنسانية جميلة، تثبت من خلالها إن الفن مش بعيد عن الشارع المصري، واستضافت في بيتها بائعة الترمس نعمات عبد الحميد المعروفة إعلاميًا بـ"سيدة المطر" وزوجها، وقررت تدعمها ماديًا وتحاول تلبي طلباتها هي وأسرتها.

ودي صور ياسمين مع سيدة المطر في بيتها: