من 6 سنين فاتوا، وبالتحديد يوم 26 نوفمبر سنة 2014، انطفت نجمة لامعة في سماء الطرب الأصيل، رحلت عن عالمنا شحرورة الغنا "صباح" بعد صراع مع المرض وعمرها 87 سنة، بعد ما تركت لنا تاريخ فني ضخم ضم: 83 فيلم، 27 مسرحية لبنانية، وأكثر من 3500 أغنية بين مصري ولبناني وأجنبي.
وعلشان عمرنا ما هننسى صوتها المبهج وضحكتها اللي كلها أمل وحياة، قولنا نقرب معاكم شوية من حياة الصبوحة اللي مكنتش سهلة خالص، فتعالوا نعرف أصعب مواقف عاشتها في حياتها:
فقدت صوتها بسبب بنتها
كشفت صباح في حوار تليفزيوني إنها فقدت صوتها لفترة من الوقت، بسبب زواج ابنتها الوحيدة هويدا بدون علمها، الموقف ده أصاب صباح بحالة جنون، وبقت تصرخ وتضرب نفسها، لإن بنتها كانت صغيرة في السن، وكانت بتخططلها إنها تكون أحسن بنت في المستقبل، واضطرت في الفترة دي تغني في مهرجان "بعلبك" وهي مصابة بنزيف في الحنجرة.
موت أختها قدامها
اتوفت جولييت الشقيقة الكبرى للفنانة صباح، وهي عمرها 10 سنين، بعد أصابتها بطلق ناري في رأسها بالغلط في فرح أحد أقاربهم، وده كان سبب مغادرة الشحرورة قريتها، وقررت تعيش في العاصمة بيروت.
خيانة والدها لوالدتها
والد الشحررة، جرجس فغالي، مكنش أب مثالي، كانت تصرفاته معاها فيها قسوة، وكمان مع والدتها والأمور اتعقدت أكثر لإنه كان مدمن للشرب، بجانب خيانته المتكررة، واللي دفعت زوجته لخيانته هي كمان.
أخوها قتل والدتها
أنطوان فغالي شقيق صباح، شاف والدته بتخون والده مع رجل غريب، فأطلق عليها الرصاص وهرب للبرازيل لكنه رجع لبنان بعد سنوات طويلة.
اتجوزت راجل قد أبوها
معروف عن صباح جوازاتها الكتير، وأول جوازة ليها أثرت في نفسيتها بطريقة صعبة، ودايمًا كانت بتحكي في حوارتها إن جوزها الشماس كان في نفس سن والدها، واضطرت تتجوزه علشان تهرب من تسلط والدها ومعاملته القاسية ليها.
